記錄第5 個月成長狀況

森森成日想拉自己起身坐，但未夠力坐唔穩。所有d 玩具佢都想坐住玩，要人扶住坐，我唔走得開了。以為playnest會輔助未坐穩嘅baby 坐，所以買了個， 點知唔啱用，個seat 太大，左搖右擺好易瞓低，佢又未夠力坐起身。剛剛呢幾日black friday, 有sale, 買了張baby high chair booster,  適合我間細屋。

食奶果陣東張西望，成日望爸爸做緊乜，超八卦。而家有時食5 餐，有時7 餐，多數6 餐，18 周果陣試過2 日瞓過夜，夜晚冇嘈肚餓，6 點扭食奶咀，8 點準時食早餐。到20 周仍戒唔到夜奶，食奶時間開始唔定時。。。

19 周開始溝米糊，開頭係稀稀地係奶樽吸，後來整杰d 用羹食，都算習慣，但仍未可以當做一餐。

轉咗食hypoallergic formula, 朋友介紹雀巢能恩，都ok 喎，面d 濕疹發嘅範圍細咗，身體同手腳都滑咗。

同朋友討論過保嬰丹問題，我的結論係暫時唔好買余仁生。。。

冬天去街，暖氣太熱，要除晒衫。上火車，地鐵，children center, 去飲茶。。。都熱到打大赤肋，好勁。唔除的話會出濕疹。對於每個人(包括陌生人) 都話我唔俾衫佢著，我開始感到煩厭，難道佢熱到滿面通紅都要俾佢著衫？生濕疹爛面果陣邊個承擔後果？咪又係我同仔。。。所以唔該唔好咁多意見，得唔得。。。

記錄第四個月成長狀況

森仔有濕疹，仲唔止流湯，流埋血。分佈係全個人，其中面同頸最嚴重，要搽類固醇藥膏，呢種藥會整薄皮膚，第日好易整損出血。所以我諗住轉奶粉，gp 俾咗豆奶粉，但冇諗過係咸的，仲要有咸魚味。。。所以我問朋友佢用咩奶粉，諗住試下nestle nan ha pro 1, 剛好英國ebay 有人5 鎊賣1 罐400g, 都算合理，買2 罐返嚟俾仔仔試。溝奶飲了1 個星期，d 屎係墨綠色，同超臭。個賣家突然去了dubai, 搞到我要訂貴貨，係belgium送嚟3 盒nestle nan ha pro 1 750g,15 鎊1 盒。。。如果餐餐係belgium送過嚟，牛奶金唔夠俾

佢識拉bouncer 果個音樂了，係地下自己打側瞓，但胸貼地撐起就好吃力。15 周開始成日想起身坐，16 周起瞓係度嘅玩具都想起身玩，我要俾佢靠住先坐得穩，所以我變得好唔得閒。佢開始有喜好，唔鐘意就叫得好大聲。成日扭瞓覺，放上床又唔肯瞓。頭擰得好快，八卦到死，去gp 度睇濕疹時，逐個人盯著望，個個望到佢都話好得意 :)  塞2 隻手指入去挖個口，口水唔單止成面都係，流到落心口。朋友話佢用口水沖涼 :D 係教會熱到大叫，除咗上半身，d 人話而家冬天，佢咁大隻㗎... 冇計啦，熱到佢d 疹又發了。

12-14 周仲係食7 餐，14 周完果陣濕疹發作，baby 搽完steroid cream 好渴睡，食少咗 1 餐，開始4 小時1餐，一日6 餐，食150-200ml (6-7安) 左右。佢開始亂抓嘢，抓我d 頭髮，小心眼鏡被抓甩。

其實我唔明點計，baby 16 weeks係4 個月大，還是真係到11 月25 日先4 個月大？因為想開始食米糊，因為過敏起濕疹，如果係奶引起的，食米糊應該會好d. 同埋飽肚d 可以戒夜奶。

嫲嫲的縱容

嫲嫲真係訓練嬰兒嘅殺星，喊一陣，唔夠5 分鐘，就話怕'攝'親，唔問過我直接抱起佢。開頭已經講咗我個訓練原則俾佢知，但佢依然唔依我果套。呢d 人最好暫時疏遠，廢事第日個仔真係變咗世界仔(如嫲嫲成日唸口黃所言，其實我好懷疑佢知唔知世界仔係貶義詞). 訓練果陣梗係喊㗎啦，d 細路去咗新環境，以為有新規則，實際上只係張床唔一樣，規定係一樣，嫲嫲就忍唔住走去抱，係屋企我都係在玩嘅時候先抱，唔會抱住哄瞓覺。佢就抱住佢瞓覺，最麻煩就係呢樣，自從果日返屋企後，阿仔以為例必有人抱瞓覺，係床仔哄佢瞓成10 分鐘，跟住瞓唔夠半個鐘又醒，又要去哄佢瞓返。講真我呢d 要pump 奶嘅媽咪邊有咁多時間呀。我奶奶仲話煲魚翅瓜好易，帶住個唔願瞓嘅仔，痾屎都要1 分鐘完事，點可以係半個鐘內完成pump 奶，煮麻煩菜式，食飯，洗碗，打掃，痾屎，沖涼？所以我一定要俾佢學自己瞓。總之，嫲嫲就係寵壞孩子嘅兇手。

因此我發咗個text 去佢wechat,  叫佢等bb 喊10 分鐘先可以睇佢，否則就好似而家咁，我要重新訓練佢。

我重新訓練佢果陣，佢連續喊咗半個鐘，成身濕晒，聲又沙埋，我仲心痛呀

記錄第三個月成長狀況

呢個月開始訓練baby 食奶瞓覺模式，跟住on becoming babywise 呢本書做，中文叫從0歲開始，但翻譯到一舊舊，冇原文咁好。

Bb開始可以瞓返床仔，係床上哄下就瞓著。起初訓練，喊咗個幾鐘唔收聲，又唔會累到瞓著，好長氣。後來我每15 分鐘入去呵下，好快瞓得著。

Baby 開始對人笑到卡卡聲，尤其對鏡中嘅自己。好八卦係咁望人行嚟行去。未識翻身，翻到一半跌返落嚟。學講a-lu, ha-p, a-gu 等等幾個音的發音。手仔可以自主性地合埋一齊啦，食雞脾仲食到㗳㗳聲，又要拎埋人隻手去食。又開始到咗用舌頭感受世界嘅歲月。佢腰骨好硬，坐得好直，但一般baby 可以自己坐直，係6 個月左右，所以唔好咁快俾佢學自己坐，繼續癱下啦。佢會想拉自己起身坐。

月底居然出現濕疹，仲要受細菌感染，流血水流到成件衫都係，發覺娥羅納英藥用雪花糕都可以搽濕疹，效果幾好。不過都係去睇gp, 開咗d 抗生素皮膚藥嚟搽，第1日搽甩好多皮，第2 日甩少咗，面好似好返d, 希望快d 好啦！

記錄第二個月成長狀況

第二個月
奶奶在我剛完月子時去了一星期旅行，又有學生在我家住，結果我忙到不得了，超辛苦。

Bb 開始學笑，同學講嘢，都係單發音，aeiou 果d 啦。依然手舞足蹈，頸好有力，雖然有時會突然搖前或搖後，但已經可以講係能夠支撐住。喜歡望鏡，開始睇到bb床上hanging mobile, 一開就好高興。又會玩bouncer 上的掛吊公仔，玩到好肉緊，而且可以玩30 分鐘了。

第7 星期磅數是5005g. 飲奶到120 ml, 問朋友拿人奶，味道似乎唔太鐘意，要mix 奶粉。都好過冇啦！

睡覺同媽咪瞓，爸爸瞓廳。要人陪，放係bouncer 搖佢先易瞓，行開一步都唔得。

附上第二個月照片

記錄baby 一個月成長狀況

第一個月
係醫院住咗6 日5 夜，一返家就growth spurt, 2 公婆成個星期5am 先瞓。

Baby只懂得喊，頭仰45 度，時常手舞足蹈。咩都望唔清，晚上成日扎醒。喜歡望光。

奶奶來幫忙坐月，中午可以休息一陣。Baby 唔食乳頭，要pump 奶，奶粉為主，人奶為輔。問朋友拎人奶，mix 奶粉食。

出生磅數3602g, 有7.9 磅。在醫院時已經回升到3670g, 第4星期是4500g. 

過了growth spurt, Bb晚上睡覺ok, 早上好飄忽，奶奶嚟果陣佢會瞓2-3小時。

有些少濕疹(奶癬), 時好時壞，搽母乳。

附上第一個月時的照片

授乳茶

森森一路都唔肯吸乳頭，按理嚟講應該會越來越少人奶。

佢一出世，我擠得出1 滴咁多初乳。。。出院後每日食薑醋同炒雞酒，一個月後每日都係pump 到100ml... 但自從飲授乳茶(nursing tea), baby 7 weeks 可pump 到每日200ml. 呢個數字雖然都係少，但冇減少反增加，所以呢個係無奶嘅朋友嘅福音。

森森呢個星期8 weeks 啦，依舊瞓得唔多，成日四圍望，食緊奶都擰嚟擰去。佢開始講到2 音，好多時講ar lu, 又會對人笑，有次瞓瞓下仲笑到出聲！

我就依舊好肥，餵人奶唔敢胡亂減肥。。。等到仔仔3 個月，我先唔係半夜pump 奶同唔飲nursing tea，我諗果陣先會越嚟越少。戒咗pump 奶，我先減肥。

仔仔相

原來佢先出世咗13 日，仲以為過咗好耐。佢個樣好似人地滿月咁，又成日諗嘢望嘢，應該係聰明仔。老積仔成日扭計唔肯瞓，又自己嚇醒自己，所以暫時我同佢做廳長，廢事嘈親隔離屋。鄰居好有心，剛好我出門果陣contraction蹲咗係門口，見到佢地返屋企，佢地好有心咁問候，出院後仲送咗件衫仔俾bb!  佢地先搬嚟半年咋，真係好好！

子森bb晚上成日嚇醒喊，今日奶奶幫我整壓驚袋，ok 喎穩定咁由2am 瞓到4:30am 都冇醒，不過要睇住唔好俾佢壓到頭，雖然已經有包被，但都有d 驚，所以我而家冇瞓係度打blog, 等多個零鐘佢醒就餵奶。

Bb 唔肯食人奶，好煩要吃奶粉，搞到我而家日夜pump 奶，每次都唔夠30ml...話說回來，philips avent 的奶泵，如果乳頭細都ok, 我乳頭大成日整到我好痛，我用返medela 啦，因為可以買唔同size 嘅杯。舒適度係好緊要，用返medela, 起碼都吸到單邊20 ml, 而philips avent只有少於10ml.

40 周 + 4日

Baby Sam 出世了！

陣痛一係就唔來，一來就劇痛。7月25日8pm 開始陣痛，我諗住食完飯去收碗筷，突然有一下痛到行唔到，企咗係度衣牙鬆鋼，講唔到嘢，老公開始感到唔對路，我陣痛之間叫老公幫我計時。原本好唔穩定嘅contraction突然變得好穩定，3.5分鐘1次，每次由痛開始計40秒，由變硬開始計就唔止了。半個鐘後老公打電話給醫院，醫院唔知我咁嚴重，老公又唔知我痛成咁，話如果check 完唔得會叫我反歸，問我去唔去。我當然話去，拿拿聲沖涼，沖涼前發現底褲有血。這不是見紅，因為bloody show 係星期一sweep 完後已經出現了。所以說要去醫院是對的。

係車度，老公好慌，行錯路，拎完maternity note 睇電話號碼後，又忘記拾返入袋。係車上有d 衝動想推，但唔敢。10 點去到醫院冇record, 我痛得好似密咗，但都頂得順，蹲係度真係會舒服d. 但去到醫院人地俾張床我瞓，我冇得卸力。開頭都仲頂到，d 人過咗一陣同我做內診，呢一陣我都經過咗好幾次contraction, 等contraction停咗再內診係好難嘅事，佢準備伸手入去，我就突然爆羊水，但d 羊水帶有胎屎，要開刀了。老公要立刻返屋企拎maternity note, 屋企同醫院大約來回要大半個鐘。我係度光等，痛咗15 分鐘頂唔順，問我老公去咗邊，我先知原來佢漏咗maternity note... 我頂唔順啦，問佢有冇gas (笑氣), 佢地話樓下做檢查係冇的，我好無奈咁硬頂。Relax 真係有助陣痛，我係陣痛中間如果唔relax, 2 個陣痛就會連埋一齊，如果relax 就起碼有1 分鐘休息下。跟住冇耐我忍唔到，話想推。Student midwife 即刻叫人入嚟睇我，我係佢地入嚟途中就痾咗bb 隻腳仔出嚟！我以為係臍帶，問nurse 係咩嚟，佢唔敢講，後來話係腳仔。痾咗隻腳仔之後佢地好緊張，拿拿聲推我去手術室，一路上佢地叫我唔好推，我中途忍唔住，推咗3 下。

到咗手術室，入面大約有十幾個人，佢哋繼續叫我唔好推，呢個時候有笑氣了，佢地講晒話要開刀取bb, 跟住打算塞返bb 入子宫！佢地塞一下，我頂唔順又推返出嚟，佢地試咗2 次，我隻手開始打針吊鹽水，準備全身麻醉。一般嚟講生仔只用半身麻醉，但唔知係咪塞唔到阿仔，佢地準備全身麻醉。後來唔知係咪因為我推咗一大半baby 出嚟，而佢地見我有氣有力，決定俾我自然生產！我就起勢的推，last 佢地叫我唔好叫，忍住推埋個頭仔！我開始感覺唔到contraction, d 笑氣原來都好勁！結果一下就推埋個頭仔。之後打針推埋胎盆，我就好relax 了。推完頭仔，老公先換晒手術服入嚟，結果冇得剪臍帶。

子森bb 出嚟嘅時間係10:52pm，由contraction到生得，都係3 小時，由到醫院至生bb大約52 分鐘，由active labour 到bb 出世，10 分鐘。我第一胎咋，完全冇諗過咁快，仲係家沖涼先去醫院。。。。。。

諗返起個過程，其實好危險，有時我諗諗下都會喊，breech 係臨生先發現，阿仔伸咗隻腳後又會點出？手腳如果叉住咗宫頸，我係咁推唔止會傷到阿仔，仲會傷到自己。。。我有d 內疚果陣我點解忍唔到要推。。。醫護人員又係點塞返bb 入子宫？會唔會係過程中搞到阿仔骨折？佢地冇腳出先自然產的經驗，點解突然會改變主意俾我推？我好肯定，如果唔係神係度保護我地2 母子，我地肯定唔可以母子平安，我生嘅極有可能唔係live birth! 我都應該會捱一刀！一諗起阿仔可能出世就俾我累死咗，我就好難過忍唔住喊。感謝耶穌保護我地！榮耀大君王係值得尊崇！感謝主縮短我嘅陣痛時間！同埋保存我兩嘅生命！

我地2 母子係醫院住咗5 日，因為阿仔出世果陣呼吸困難入咗special care 2 日，要打抗生素打到第5 日。而家冇事啦！俾大家睇下佢剛出世嘅樣。

40 周

流好多分泌，但陣痛唔規律，我以為冇宫縮。。。星期二去見midwife話開咗2-3cm, 做了membrane sweep(內診掃胎膜), 依舊冇咩反應，流咗血一日，之後又冇痛了。。。今日星期五，仲未生得。

又到39 周

39 周開始多數係家待產

英國呢幾日鬼死咁熱，24 度完全冇風，明天仲會29 度。。。 點捱啊。。。好想租有冷氣嘅酒店瞓一晚。呢個時候特別掛住香港商場嘅冷氣，同埋一落街就可以買到嘢食。。。

Bb 咁耐唔出嚟，好熱啊。。。之前仲心郁郁想買部小冷氣，而家唔洗買了，肯定貴到七彩同斷貨。

38 周產檢

除咗bb 左右倒轉之外，冇變，又係未入盆。

冇力，還好做晒家務。有d 人nesting會好精力，有d 人會相反。

bb 而家唔會踢，多數扭嚟扭去，頂嚟頂去，有時手腳一齊郁，成個肚會歪晒。留意baby 冇減少活動，每個鐘都有郁就冇問題了。

世界盃好麻煩，老公瞓夜咗，入嚟嘈醒我，夜瞓影響荷爾蒙，好討厭。

可能我太熱氣，所有涼嘢對我冇咩效，咁就唯有等上帝安排啦。

記錄超腫豬蹄

我發現比較有較減輕水腫的，係浸冰水，浸完long 起腳，對腳會由紅變返正常，雖然唔係去晒水腫，亦唔可能去到水腫，但對於行路腳面腫痛嘅我已經唔錯，腳板冇咁熱同痛，所以各位臨生嘅朋友可以試下。呢個方法係midwife教的。

36 周

到36 周，手腳超腫，咩方法都冇用。紅豆水，做運動，行路，long 腳坐。。。冇樣得，而家對腳好似bb 豬蹄咁。換鞋啦！！！

妊娠紋生到大脾，朋友介紹用clarins tonic body treatment oil 同stretch mark minimizer, 用咗感覺好易吸收，生完都可以繼續用。

Bb 有2/5入咗盆骨，未算engage, 但midwife話即使而家生得，都可以順產。原來bb 一路都係倒L 字形頭向下瞓，唔係我諗嘅正L 字形頭在下。midwife話我有好多braxton hicks. 果然有經驗的midwife比較好, 上幾次midwife放假，另外果個midwife後生，連bb 頭仔都摸唔到，要胎心機聽個頭仔個心跳，再因應心跳大細聲去預計shoulder係邊。呢個midwife一按就按到b 仔個頭同瞓法，b 仔仲用頂頭鎚頂咗一下midwife，好活躍呀！

寫咗birthplan,  希望到時bb 乖乖，過程唔好停，係pool 坐到生到bb 啦。Tens machine 到咗，租21 鎊7 個星期。

呢個星期希望可以照樣游水，仲要游15 次先用完張游水卡，即係如果日日去，要游3 星期。但由於成日作病唔夠瞓，所以未必可以用晒張卡，都ok 嘅，咪買多半年membership, 帶埋仔仔去游水囉。

尋日堂妹生咗啦，6.6 磅肥妹仔，太好啦。我舊同學又係6 月16 日生咗個女，真係開心。而家差我同我教會朋友，預產期同一日，應該佢會跑出先，因為bb入咗4/5啦。我最遲都會係5 星期內見到阿仔，忍耐！好快會過咗呢個9 個月非常悶嘅孕期。我又可以做家務，唔洗屋企咁污糟。

很累呀

以前d 人懷孕都仲要擔泥，相比下我都算幸福。不過又點可以比較呢，人人嘅體質唔一樣，有人懷孕後要食藥瞓床，有人去打波跳繩都冇事，有人行一陣就見紅。。。

呢個BB係唔易得來呀，可唔可以珍惜下，唔好當我係工人呀？

我一早就分d 家務俾老公做，結果有d 地方成個懷孕期都冇抹，地下吸塵我老公做過1-2次，廚房爐頭唔叫佢都唔抹，碗又隔日先洗，廁所起晒漬，浴缸又污糟，d 嘢鋪晒塵。。。雖然有時我諗佢返工好攰，但放假都唔做，寧願去踩單車。。。有時真係好想佢返舊屋住，我自己照顧自己，地方冇咁污糟，起碼冇咁嬲。

男人呀，點解你唔體諒下大肚婆，好鬼累啊，每日買餸煮飯洗衫，仲要兼顧埋清潔，爬高爬低。。。

Show 巨肚

34 周46 吋巨肚，爆晒紋。。。

32 周產檢到現在34 周啦

因為擔心midwife說的thrush, 所以忘了寫blog. Thrush 是種常見的fungus, 只要身體荷爾蒙混亂，陰道健康細菌與fungus不平衡，fungus 就會過多，引致痕癢，有色分泌和異味。 我没有痕癢或異味，只是黃色分泌，所以midwife拿了點分泌去test, 結果是正常，總算放下心頭大石。

下次是36 周產檢，到時要寫birth plan 了。兒子還没調頭。。。與我一同懷孕的姊妹已經調頭了，還engage了，我的怎麼這麼遲，書話第一胎會早喎。下次midwife再摸不到胎兒位置，我就付100 鎊看胎位。

這周胎兒正常，也很活躍，5am 就醒了。。。起初我不習慣，現在34 周習慣了。天氣開始熱，一整天都流汗。羊水開始變少，有一次被胎兒踢得很不舒服，我由下向上拉，希望他會翻身，我好像摸到他的肩骨。。。

繼續游泳，改善水腫，走路也没之前咁重咁辛苦。用薄薄的cushion 墊著睡覺，肋骨没那麼痛了。不過怎樣坐都腰骨痛，慘，只能躺著舒緩，游泳都可以舒緩一陣。

原來好多人都唔知perineal massage, 係按摩birth canal, 令birth canal 可以有彈性d, 生bb 果陣可以冇咁辛苦，甚至可以冇tears 唔洗剪陰道。一般人生仔都會有撕裂，或者會剪開陰道口。用嘅massage oil 一定要係for perineum會陰，同埋有d 情況係唔適合用嘅，比如thrush 或性病之類，一定要問醫生建議。Massage果陣唔可以掂到尿道，以防感染。Massage前要做清濕陰部同手。第一步驟係先relax 左右陰唇，然後用手指公伸入birth canal作u 形按摩，再往外拉。第二步驟係用手指公向肛門往外拉，hold 住1-2分鐘。過程重覆至10 分鐘左右，每日或一星期4-5次，一星期後會見效果。我剛開始做，都幾痛，不過可以忍到, 慢慢撐大好過一次過撐大，起初放得1 隻手指，而家可以放2 隻了，雖然仲未放到手指公，但都叫有進步。呢個massage會有助產後回復原狀。如果有興趣，可以係google 找perineal massage 嘅圖片，睇前要有d 心理準備，如果真係拉到咁大，應該都幾痛。

就快32 周啦

話咁快又32 周，好似瞓成日都得咁，但我又唔想d 時間就咁hea 晒，又唔想做家務。。。嘻嘻！

個肚時時有半邊硬咗，上網睇話應該係bb 郁，都似呀，每逢有胎動，個肚先會硬咗半邊。而braxton hicks 應該係全個肚都硬的。

Bb 29 周轉咗活動時間，而家又好似轉多次，整日幾乎冇停過。腳仔成日係肋骨附近，有卡住嘅感覺。間中唔夠氧氣，瞓係度果陣俾bb 壓住血管，繼而有2 秒心跳加速。midwife話墊高嚟瞓會ok, 但墊高嚟瞓的話，我係好舒服呀，bb 唔係太鐘意，又有discharge,  所以放棄了。

我好多謝我有水腫，因為如果冇水腫，個肚又突起，側瞓嘅時候個肋骨位'lup'咗入去，勁痛，成晚轉身瞓唔到，跟住第日就會有唔少discharge (有色白帶). 只要腳冇水腫，著到鞋就ok, 所以我都只係去游水，間中拎個按摩器嚟按腳。

Stretch mark (妊娠紋) 越嚟越多，我諗原因係皮膚太乾，有時游完水返屋企唔記得補返bio oil 同cocoa cream, 由兩邊腰側到陰毛上面。唉，睇落好鬼肉酸，聽聞生完縮肚果陣仲多。。。

31 周開始好似食極都唔飽，食subway foot long loaf 都係剛剛夠，未算係飽嘅程度。記得上次去同1 個fd 飲茶，食咗32 鎊，人地好細食，我食咗3/4,先夠飽。不過果晚飽到唔洗食飯。

我見到d 唔夠37 周唔足月bb 勁細粒，真係差幾周都唔同d. 果日去醫院產房參觀，見到好少產婦，3 層樓應該冇20 個。

走佬袋都拾到7788 啦，希望到時ok 啦。考慮緊water birth,  就快要寫birth plan 了，我想natural birth with laughing gas,  又或water birth with laughing gas.  頂，成日忘記訂tens machine,  聽聞第一個階段用嚟止痛唔錯。

29 周

好多妊娠紋。。。搽晒油同cream 都出。。。好肉酸，唉，幾年後應該冇咁明顯呱。。。。。。。。。。。。。。

個肚好大，肚臍下有45 吋，腰位都40... 水腫，手指骨節勁脹，瞓醒果陣手指有時麻痺，有時痛到唔郁得。腳抽筋，應該係側瞓時壓住d 血管，大脾抽而唔係小腿抽。Bb 唔俾我瞓左邊，我瞓右邊，壓住右腳血管，轉左邊時又壓左腳血管，肋骨又痛痛地，轉返右瞓，成晚轉身冇咩點瞓。我諗起朋友講過indian tonic water 幫助防止抽筋，唔知試唔試好呢。。。

體力下降，開始怕熱。pampas話29 周bb 開始自己學習調節體溫，生脂肪，唔知關唔關事。。。當然bb 仲要依靠我嘅體溫啦，佢只係開始學啫。

26 周

胎兒過了26 周，可惡的妊娠紋開始出現，轉了用bio oil 一星期就開始了，早知就唔轉啦。

間中有肚痛，個肚好實，好似濕熱痛咁，但可能係因為太辛苦太累，以致有少少宫縮。冇法啦，家務依然我做，格價bb 用品和買餸我都冇停過，洗衫吸塵拖地洗廁所浴缸洗碗煮飯，老公都依舊似大爺等我服侍，都怪我寵壞咗個老公，而家好攰都冇人幫，事後按摩係冇用，我想休息多d 等bb 足月先出世啊。。。

'印'帶偶然拉扯痛，bb 又反轉咗，R 我大脾隙，有次開車仲唔知做咩鬼，唔知係咪整親bb, 勁痛，搞到我拉低條褲先開得車。應該唔會整親bb, 因為佢應該有羊水保護，可能又拉親'印'帶。。。

呢個星期交返d 家務俾老公，唔想bb 有咩事，點都要拖到8 個月先好俾bb出世。呢個星期行埋ikea 就唔再行街了，原先想買櫃，但ikea 格格櫃6 月先出，唯有去睇下bb 浴盤同埋其他nursery 用品家私。

22 周scan + 雜談

Bb 呢次乖乖反轉身，sonograper唔洗5 分鐘搞掂，bb 好健康，但因為呢次太快，我除咗見到個高鼻仔外，都冇見到其他嘢，唔知個樣似我定爸爸呢？都冇影到相，要等出世先見到了。

自5 個月開始，bb 唔係細細力咁轉同踢，而係一腳伸埋嚟，成個肚突起咗，感覺好得意。不過有時都會因為bb 踢得太利害而瞓唔好。婆婆同媽咪都話，男仔係丕皮d, 冇辦法啦，佢踢都好過唔郁，唔郁我會好驚。

4 個月開始我就搽防肚紋cream,  nhs 話冇咩用，冇clincial approve 話有效，妊娠紋唔會消失，而且最終一定會淡化到淺色。不過我覺得平日我冇搽cream, 呢排搽下增加皮膚彈性，而且d cream好平，幾鎊銀搽到成個月，冇壞。用完cream 就用油，按摩下聽聞效果仲好。

呢個時期，夜尿唔算好多，但係d 書話急就要去，避免水腫同infection. 腳抽筋都咗成個月，通常大脾抽，所以唔係有嚴重妊娠疾病。原來日頭盡量抬起腳，夜晚就唔會抽筋得咁緊要。我發覺著壓力襪都ok, 有朋友話抽筋可能缺鈣，我計過每日我食鈣嘅份量應該夠。又有朋友話飲indian sparking water 對抽筋有幫助，不過我冇試，因為著咗2 日壓力襪，對腳冇再抽筋了。

過埋聽日，bb 就過咗24 周，6 個月啦，仲有3 個月左右就見到bb 了，時間過得好快啊。Bb 床，車，car seat,  揹帶，0-3個月面衫底衫帽手套襪，玩具，奶樽奶咀泵奶器都齊了，差在未洗同消毒，到差唔多時候就要揾d 太陽晒嘅日子洗完拎出去晒。有幾件3-6個月衫仔，諗住可能會有人送，所以唔買咁多。到8-9個月bb差唔多出世再買尿片奶粉沖涼盆nappy cream, 跟住就可以安心等bb 出世。

20 周scan

Bb 趴住影唔到樣，每張相都郁嚟郁去影唔清。。。照咗大半個鐘都未照完，下次要返去照過，到時再放張清d 嘅相上嚟。Sonograper話this baby is difficult... stop a second please... 我勁想笑出嚟，但唔敢郁，怕我郁bb 又郁，但唔笑bb 都照郁，結果張張都係朦查查。

baby男仔嚟㗎,每日都不停咁郁，由早到晚，都唔知佢係瞓覺定醒咗。隔晚脚抽筋，好煩。

胎心機

尋日買咗部2 手胎心機返嚟，聽咗幾次，聽到bb 係羊水度郁嚟郁去，呼嚕呼嚕好似游緊水，心跳好似機械咁。

但我一叫老公嚟，bb 就唔俾爸爸聽，一下子轉走咗，勁搞笑。

胎心機要對準心臟先聽到，已經要花10 分鐘揾，揾到的話，要係唔郁唔叫醒bb 的清況下叫老公入房聽，確係有難度。加上佢成日戴earphone 睇youtube,  所以我諗佢冇咩可能聽到bb 心跳。

16 weeks Antenatal check

今日去midwife度量血壓測小便，估唔到真係有胎兒心跳聽，比我心跳細聲好多，但係快d,midwife聽聽下 bb 仲kick 咗1 下。我諗應該係仔，咁頑皮，冇時停。過多幾個月，佢係我肚狂郁，我真係唔洗瞓。
個肚一直係38-40吋，4 個月就咁大。。。真係肥過隻豬。。。

今日4 個月啦

今日3 點半去到醫院，醫院婦產部係5 點關門，點知去到落晒閘。。。星期三要見midwife要拎maternity notes, 所以今日諗住去拎，俾2 鎊停車，得個吉。發脾氣，回家路上亂衝，差d 俾人撞倒。

呢2 日瞓得好差，到差唔多天光就有少少作抽筋，2 隻脚大脾都痛，瞓右面確係唔好，但bb 係左面啊，成日壓住又唔舒服，還好而家間中可以平瞓一陣。

驗血報告正常

驗血報告講我係low risk,  Bb 完全正常，頭到hip 有8.1mm, 冇down syndrome. 但懷孕日數寫咗13 weeks 6 days,  多咗2 日，會唔會寫錯，定係bb 長大過我原先expect 的13 weeks 4 days? 預產期都係我講佢知，冇改，諗住咩都照oxford fertility unit 講咁樣，我仲諗13 weeks 6 days,  係咪聽錯咗？

呢幾日胃氣好咗，終於放到屁，唔洗頂住咁痛苦。好似開始蜜月期，feel 唔到bb,  間中有d 驚，用手摸下，耐d 會feel 到有嘢郁。有一晚仲俾bb 踢咗一脚，早上老公知道，開心死佢，即刻要聽baby, 還好果朝bb 醒咗，郁嚟郁去，否則老公好失望。

本書介紹Incomplete cervix, 真係嚇死我，bb 係懷孕中期，子宫頸自動開，話有少少血或少少啡冇痛都可以流咗bb 出嚟，真係夠恐嚇，我懷第一胎點知咁多，前幾日妊娠冇咁辛苦，開始大掃除，搞到下面有刺痛感，嚇到我日日都要搖下舊腩腩，睇下bb 郁唔郁。3 個幾月聽覺未發育好，否則可聽大聲音樂叫醒bb。但今日懶懶閒就完全冇事，應該係一般外陰静脈曲張呱。

部車電池壞咗，又被困出唔到街，想去食下subway,  mcdonald's 都唔得。

胃氣

胃氣腸氣令我好煩，嚴重果陣一分鐘嘔幾次胃氣，又放唔到屁，之前更因此嘔到脫水入院，發現原來牛奶令我有胃氣。。。冇得飲horlick 了。某日同朋友傾計，發現toast 都可以減胃氣。

13 weeks + 4 days

呢次bb 有d 似人仔，係我肚入面轉嚟轉去，撐手撐脚，又舉手，又suck 手指，嘻嘻。一切正常，等埋個blood test,  一星期內冇醫院電話就過關啦！

不解

尋晚同朋友傾計，傾完後有好多不明白。。。一頭霧水。。。

生完後真係唔可以洗頭咩？我朋友話要盡量少掂水，但另一朋友生完立刻係醫院沖涼，話傳統係知識唔足。。。又有教生育嘅網頁話要洗乾淨d 血同汗水除菌，先健康。。。

頭12 周bb 明明冇聽力，腦同耳都未發育好，眼簾都係12 周生緊，朋友就話我唔應該講d對 bb唔好嘅嘢，怕bb 小器。我唔明，bb 感受到我嘅情緒，講嘅嘢內容絕對聽唔到。我只係話bb 嘢 6 個月先買，怕bb 小產，間唔中同老公嘈先會發悔氣話唔要bb, 但之後我立刻同bb 講返媽咪唔係真係唔要bb. Bb 小產唔會因唔人講一句就走咗的，通常係因為染色體有問題，而且多數係10周前就冇。真係一頭問號。

跟住又話英國潮濕，呢樣我好o 咀，因為我嚟咁耐，濕度試過一次超60%, d 鬼鬼就叫救命，話'立'。下雨果陣仲乾，通常都係濕度30%, 所以，尤其係夏天，我每年都流鼻血，呢排多雨，我個鼻流完鼻血係入面結痂，搞到我鼻塞。我手腕19 歲屈親後，係香港每年都風濕痛，每次都痛成2個星期，來英國6 年幾，風濕先發過1 次，仲要勁快冇事。皮膚仲乾到不得了，敏感起紅斑，偶然做mask 時勁痛。通常d mould 係因為唔開窗加有人氣，外面凍裡面暖都會有霧，唔清乾淨先會有霉菌。所以，又一個謎團。

跟住話生bb 一定要有人幫，我話上產婦班有教，佢都話唔係真實情況會唔同，仲叫我唔好信晒書。我又覺得孕婦班教咗基本，只要變通就ok, bb 點曳都可以沖到要洗嘅地方。講真唔信書，唔通信佢咩，佢都未生過bb...同埋總唔可以成日靠人，學我就快生嘅朋友話齋：依賴人不如自己邊學邊做，人地唔會成日幫你。我以前同貓沖涼，隻貓怕水抓我，由我隻手一路用爪勾住我d皮(勁痛) ，勾到去我背脊，等我捉佢唔到，然後逃走，我都係咁沖幫佢沖啦，bb 仔唔浸親佢應該ok...

我話我去廁所小便抹時會留意有冇血，我朋友居然話我唔正常，我話冇唔啱，佢就死話我錯，又話d 人梗係講：'bb 你乖乖地留係度，痴住阿媽'，我話大肚婆留意自己有冇流血係正常，加上頭3 個月唔穩定，睇下唔出奇，佢話：你咁樣我同你溝通唔到喎。我有點o 咀，係咪一定要話我錯同唔正常，而佢啱晒？

不過我都學到d 嘢，好似生bb開刀唔食薑，順產先食；唔同風俗有唔同補身習慣；坐月好重要等等。佢講d 嘢無理的話，我就話：'咁又係'算了，佢都係出於關心啫。

過幾日做ultrasound啦，到時再update 啦。